Lorenz Schürmann aus Neudorf leiht von seinem Bruder Hans Schürmann 100 Gulden.
Die kassierten Gülten im Staatsarchiv Luzern wurden hauptsächlich durch die Einzinserkasse des Kantons Luzern sowie durch die Hypothekarkanzleien im Zusammenhang mit der Einführung des Grundbuchs abgeliefert.
In einem sehr schematischen Aufbau enthalten sie normalerweise die Namen des Kreditnehmers, des ersten Kreditgebers, sowie eine Beschreibung des Unterpfandes inkl. dessen Lokalisierung.
Artikel «Gült » im Historischen Lexikon der Schweiz
Literatur:
Thalmann, Robert, Die Einführung des eidgenössischen Grundbuchs im Kanton Luzern 1929-2004. Kriens 2004
[In der Bibliothek des Staatsarchivs unter der Signatur Bro B 2748]
Das Original liegt im Staatsarchiv Luzern mit der Signatur: GK 65/2
Druckbares Dokument (5 Bildseiten)
Klicken Sie auf ein Bild, um eine vergrösserte Bildschirmansicht zu erhalten.
[Titel]
Verschrybung
Lorentz Scheürmanns zue
Nüdorff in St. Michaels
ampt gesessen, umb 100 gl
hauptguots gegen Hans
Scheürmann in der Alp im
ampt Rotenburg gesessen,
sinem geliebten bruoderen.
Zinset jährlich uf Liechtmeß
5 gl, sechs jahr lang.
Löst sich ab sammenthafft.
Angangen a[nn]o 1660.
[p. 1]
Ich Lorentz Scheürmann zu Nüdorf
in St. Michaels ampt gesessen, bekenne offentlich hiemit
für mich unnd mine erben, die ich dan sampt mir herzue
vestenklich verbinde, das ich umb eines besseren nutzens
willen, denselbigen domit zu fürderen unnd anligendten schaden
zu wenden, eines uffrechten, redlichen unnd wüssenhafften
kauffs zue kauffen geben hab dem ersammen, achtbaren
unnd bescheidnen Hans Schürmann uff der Alp zue ampt
Rotenburg gesessen, minem geliebten bruoderen, zu syn
selbst, syner erben unnd allen anderen mit recht inhaberen
dis brieffs handen, namblichen fünf guldin gelts
in müntz U[nserer] G[nädigen] Herren der stat Lucern wärung, recht
jährlich unnd ablosliches zinses unnd inkohmmens, den ich
oder mine erben den inhaberen dis brieffs fürohin sechs
jahr lang jährlich unnd insonderheit so lang diser brieff by
crefften blybt, allwägen uf Liechtmess oder in den
nächsten acht tagen vor oder nach ungefharlich richten, währen
unnd bezhallen sollend unnd wöllend, von ein hundert
guldenn obgedachter wärung hauptguets, deren ich dan von
ihme keüferen uff min guet benüegen mit baarem gelt
gentzlichen usgericht unnd bezhalt bin, unnd deswegen
ihnne unnd syne eerben dessen für mich unnd mine eerben
hiemit quit sey, ledig unnd loossage. Gelob unnd ver-
sprich auch für mich unnd mine eerben, zu endt gemelter
sechs jahren, das ist nach verfliessung des sechsten jahrs,
dise hundert guldin zue einer zhallung samenthafft
[p. 2]
sampt marchzelligem zins widerumb zue erleggen unnd zue er-
staten, unnd also durch dis mitel obgeschrybnen zins kauff
von den inhaberen dis brieffs widerumb ze lösen unnd crafftlos
ze machen, aber alles, es sey zins oder hauptguot, antworten
zu den inhaberen dis brieffs sycheren handen, unnd ohne einichen
ihren costen unnd schaden, es were dan sach, das nach
v[er]schinung der ersten sechs jahren von den inhaberen dis brieffs
neüwe anstellung auf andere sechs jahr, unnd allso fortan
weyters erlangt werden möchten, so sollend als dan die
inhaberen dis brieffs, all die wil das hauptguet nit bezogen
wirdt, us krafft U[nserer] G[nädigen] Herren der stat Lucern
ansächen unnd usgangnen mandaten bei dem ersten dato
dis brieffs, auch den elteren rechten unnd vortrit ohne
einiche hinderung vor menigklichen verpliben. Wan dan
sy, inhaberen dis brieffs, das hauptguet widerumb bezeüchen
wöllend, mögend sy es woll thuen, nach wöllicher v[er]flossner
anstellung es sye, allein das sy es unns ein halb jahr darvor
abkündend. Ebenmessig, so wir für unns selbsten aigens unnd
ungenötigs willens ablösen woltend, zue wöllicher anstellung
oder auch darvor, wan es were, sollend die inhaberen dis
brieffs unns solliches gestaten unnd das hauptguet sampt
zins unnd costen, ob einicher daruf gangen unnd unbezhalt
usstunde, doch anderst nit dan zue einer zhallung sam-
menthafft, wie obgemelt, von unns zu nemmen schuldig sin,
unnd das wir es ihnen auch ein halb jahr darvor abkünden
thüeyendt. Von, uff unnd ab mein undern
[p. 3]
Brommen weydt, so vier jucharten haltet, mit aller zue-
gehördt, altem härkohmmen, recht unnd gerechtigkeyt, stoßt
erstlichen an des Peter Habermachers Bromen weydt, zum
anderen an den Bromenwaldt, unnd drytens an das
feldt Lynden. Ghat dorab bodenzins jährlichen ein
müt beyderley guets, ist fällig unnd ehrschetzig der
styfft Münster nach laut der bereinegung, ist auch
hinder 300 gl vergryffen, welche doch durch Claus Thaly
unnd synen brüederen dis laufendten 1660 jahrs soll
abgelöst unnd ledig gemacht werden, sonst demnach bis
an gewonlichen zehendin, kirchen- unnd vogtrecht fry, ledig
unnd eigen. Ist durch die ersammen, fürgeachten unnd
bescheidne Jacob Ineichen unnd m[eiste]r Jacob Wapffen,
beyden amptsweyblen, unnd jung Hans Estermann,
allen des grichts zu Nüdorff, zue diseren zyten zwey-
hundert guldin woll währt zue sin gewürdiget unnd geschezt
worden. Allso mit denen rechten unnd gedingen,
wan ich oder mine erben an erstatung dis brieffs inhalts
sümig sin wurdend, dan sollend unnd mögend die inhaberen
dis brieffs obbestimpte unnderpfandt mit oder ohne gricht
unnd recht angryffen, vertigen, hafften, pfenden, verganten,
verkauffen unnd triben, so lang unnd vil, bis das sy
umb ihrem usstand sampt costen unnd schaden gentzlich
usgericht unnd bezhalt sindt. Es habendt aber Unnser
[p. 4]
Gnedig Herren unnd Obern ustruckenlich gesezt und ange-
sächen, das disere zins verschrybung, wan sy ussert ihr
statt unnd landtschafft, in was gestalt das sye, verhand-
let, versezt, verkaufft, vertuscht oder übergeben wurdt,
an gricht unnd recht, auch gelts- oder uffaals tagen unnd
sonsten anderst nit (es geschäe dan mit sonderbarer verwill-
igung Unnserer Gnedigen Herren] dan für ein handtge-
schryfft geschezet, unnd also solle bezogen werden, alles ge-
trüwlich unnd ungefharlich. Unnd dessen alles
zu waarem urkhundt hab ich obgenannter Lorentz
Scheürmann mit sonderem flyß unnd ernst erpeten den woll-
edlen, nootvesten, fürnemmen, fürsichtigen unnd
wysen herren h[erre]n hauptmann Johann Thüring Göldin
von Tieffennauw, des inneren rhats der staat Lucern und
der zyt landtvogt zu St. Michaels ampt, minen günstigen
hochehrenten junckheren, das er amptshalben sin eigen secret
insygel für mich unnd mine eerben (iedoch ihme unnd sinen
eerben in allweg ohne schaden) offentlich getruckt auf dis-
eren brieff, so geben unnd angangen ist uf Liechtmes nach
Christi unnser heylandts gnadenrychen geburt gezhalt
sechszehen hundert unnd sechszig jahr.
Nic[laus] Anderallmendt
amptsch[reiber]
Transkription: S. Jäggi
Produktion: M. Lischer